कालचीच गोष्ट, फोटोत तुझे डोळे पाहिले
दूरदेशीचे दोन तारे, विचारात गढलेले
मौनातूनच बोलले काहीतरी.
काश! मी तुला ते सांगू शकले असते...

असं वाटलं तू नाहीच आहेस तिथे
तुझं अस्तित्व लांब कुठेतरी जाणवतंय
कुठेतरी दूर, माझ्याबरोबर.
आणि तुझ्या चेहऱ्यावर कवडसे पाडणारं प्रेम
माझ्याकडच्या नक्षीदार आरश्यातून

तू आरश्यातून हळूच बाहेर पडतोस, शांतपणे
ढकलून देतोस स्वतःला माझ्या मिठीत
एखाद्या हरणाच्या डौलाने.
तुझ्या ओठातली आग पेटवत रहाते
एक अनोळखी दिशा

तुला पाहिलं, आणि तुझ्या फोटोत जगले
तुझ्याजवळ, खूप खूप जवळ
तरीही तू म्हणतोस
आनंदाचे दिवस अजून यायचे आहेत!

- Bir fotografta sen चा स्वैर अनुवाद