चित्र जरा काढावे म्हणोनि,
       कुंचला माझिया हाती
       अन, रंग-सारे नयनी तुझ्या

घडवावी एक सुरई म्हणोनि,
            चक्र माझिया हाती
            अन, शाडुसम-मऊ स्पर्श तुझा

भरावा जरा कशिदा म्हणोनी,
               सुई माझिया हाती
              अन, रेशमी-गळाभर हात तुझे

रांधावे काही गोड म्हणोनि,
         तपेली माझिया हाती
         अन, उष्ण-ओले ओठ तुझे

विणावे जरा वाटले म्हणोनि,
         लोकर माझिया हाती
         अन, उबदार-घट्ट मिठी तुझी

गाणे जरा शिकावे म्हणोनि,
             सूर माझिया कंठी
             अन, रियाज सोबतीचा तुझ्या

सूर जरा छेडावे म्हणोनि,
       सतार माझिया हाती
      अन, षड्ज त्यातून साकार तू