उरलेल्या उपिठाचे कटलेट:
भरपूर माणसांच्या जेवणाची सवय असली की दोन माणसांचा अंदाज कसा येणार? मग काय होतं जास्त... जास्त झालं तर त्यातून काहीतरी आवडीचं केलं तर संपणार! बघा कृती...कदाचित यासाठी उपीठ/ उपमा/ सांजा मुद्दाम उरवाल!
साहित्य: दोन वाट्या उरलेलं उपीठ, एक मध्यम बटाटा, तीन लसूण पाकळ्या, छोटा तुकडा आलं, एक चमचा तिखट, पाव चमचा हळद, कोथिंबीर, मीठ, तेल
कृती: बटाटा शिजवून घ्या. आलं लसूण पेस्ट करा. एका थाळ्यात उपीठ घ्या. त्यात कुस्करून बटाटा, तिखट, मीठ( हे बटाट्या पुरतं घाला, उपिठात सगळं आहेच), हळद, बारीक चिरून कोथिंबीर घाला. छान मळून घ्या. आता छोटे गोळे करून त्याला कटलेटचा आकार द्या. तव्यावर तेल सोडून शॅलो फ्राय करा. सॉस बरोबर किंवा चटणीबरोबर सर्व्ह करा.
टीप: १)लहान मुलं घरात असतील तर कटलेटच्या मध्ये तयार करताना छोटा चिजचा तुकडा ठेवा.
२) मी उपिठात शेंगदाणे घातले होते ते कटलेट मध्ये मधेच छान लागत होते.