असामान्य, लोकोत्तर स्त्रियांची चरित्रे आपण सगळ्या नेहमीच वाचतो,अभ्यासतो. मात्र ज्या स्त्रियांना आपण लहानपणापासून आपल्या नजरेसमोर पाहत आलोय, त्यांचं जीवन हे अगदी जवळून न्याहाळत आलोय किंबहुना त्यांच्या जीवनातील आपणही एक भाग आहोत अशा आपल्याच घरातील, अवतीभवती वावरणार्‍या स्त्रियांचा आपल्या स्वतःच्या जडणघडणीत फार मोलाचा वाटा असतो, असं माझं मत. आपल्या घरातल्याच म्हणून आपल्याला काही विशेष असे वाटतही नाही त्यांच्याबद्दल, पण कळत नकळतपणे त्यांच्या संस्कारांची जडणघडण आपल्याला लाभत असते आणि त्यानुसार आपलं जीवनही आकार घेत असतं.