नमस्कार मैत्रिणींनो, मी साधना. सध्या आंबोली ह्या पश्चिम घाटातील पर्यावरणाच्या दृष्टीने संवेदनशिल म्हणजे हॉटस्पॉट असलेल्या खेड्यात राहते व शेती करते. मला निसर्गाची ओढ पहिल्यापासुन होती व कुंडीत रोपे लावता लावता कधीतरी शेती करायची ईच्छा मनात आली आणि लॉकडाऊनमध्ये तिला मुर्तस्वरुप आले. थण्ड हवा व अतीवृष्टी यामुळे आंबोलीला शेती करणे खुप कठिण आहे. इथे लोक जितकी होते तितकी शेती करुन त्यात समाधान मानतात. मलाही हेच करावे लागतेय/लागणार. तरी त्यातल्या त्यात इथे काय काय होऊ शकते याचा अभ्यास करुन प्रयोग करत राहायचे असे ठरवले आहे.
माझा शेतीचा प्रवास इथे मांडला आहे. थोडा विस्कळीत आहे, थोडा पाल्हाळिक आहे. कित्येक गोष्टी मलाही नव्या असल्यामुळे त्या इतरांना डिटेलमध्ये सांगावाश्या वाटतात. जसा वेळ मिळेल तसे लेख लिहित जाईन.
तुम्हाला वाचायला आवडताहेत याचा आनंद आहे. लिहिताना मला पुनःप्रत्ययाचा आनंद तर मिळतोयच पण तेव्हा लक्षात न आलेल्या गोष्टी लिहिताना लक्षात येताहेत.
मैत्रिणींनो, तुमच्या भरभरुन प्रतिसादांचे आभार कसे मानू? बस तुमचे प्रेम असेच राहो.
डिस्क्लेमर :
१. ही लेखमाला माझ्या वैयक्तिक अनुभवांवर आधारित आहे. माझे शेतीविषयक ज्ञान अतिशय मर्यादीत आहे. मला जे पटतेय, परवडतेय व करता येतेय ते मी करत आहे. मी करतेय तेच बरोबर हा माझा आग्रह नाही.
२. मी कुठल्याही एका नैसर्गिक शेती पद्धतीचा प्रचार करतेय असा समज करुन घेऊ नये. जी पद्धत बरोबर आहे असे मला वाटते ती पद्धत मी अनुसरतेय, इतर अनेक पद्धती पाहतेय, माझ्या वातावरणात काय योग्य आहे त्याचा विचार करुन वेळोवेळी शेतीत बदल करतेय, नव्या गोष्टी स्विकारतेय. मी अजुनही शिकण्याच्या मोडमध्ये आहे. अधिकारवाणीने दुसर्‍याला सल्ला द्यायच्या मोडमध्ये मी अजुन नाहीय.
३. लिखाण थोडे विस्कळीत वाटण्याचा संभव आहे कारण बर्‍याच गोष्टी आहेत व त्यामुळे एकत्रित नीट मांडणी जमत नाहीय. तरी सांभाळून घ्या.
*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&*&