टुमदार बंगली
टुमदार बंगलीच्या - प्रवेशदारी कमान
बोगनवेल झुकली - मग उंचावते मान
मधुमालती चढली - नक्षीदार जाळीतून
निळी-पांढरी गोकर्ण - टवकारती कान
कुंपणावरील कोरांटी - कां करते तणतण
गुलाबकळी हसली - तेवढ्यात खुदकन्
आत टाकलं पाऊल - लाजवंतीस चाहूल
लाल पिवळी कर्दळी - न् लाललाल जास्वंदी
बोलेल कशी तगर - खुणावेल ती अबोली
चमेलीच्या अंबराला - पानाफुटीची झुंबर
गारवेलीचा गार वारा - खाली चिमणा पसारा
चाफा कां झाला अस्वस्थ - उभा प्राजक्त तटस्थ
गाणे गाई कुंदकळी - गोफ गुंफी गुलबाक्षी
मुरडता चाफेकळी - पारिजात होई साक्षी

अंबेचा उदो बोला
अश्विन शुध्द प्रतिपदा ,येई येई ग शारदे
झाली घट स्थापना , देई देई ग वरदे
दिवा अखंड लाविते,तेज ऐसे उजळू दे
कर जोडूनी नमिते ,कृपा सदैव असू दे
नऊ दिनी नऊ दुर्गा ,नवरात्री रंगे गर्बा
द्वितीयेची चंद्रकोर ,भाळी रेखे एकवीरा
खुले नेसू हिरवेगार ,लेणे शोभे अंगभरा
अंबा नांदे करवीरा ,' फुले साज ' तृतीयेला
नको काळा न पांढरा ,ऐसा शालू हवा तिला
केशरी प्राजक्त देठ ,भंग भरला सिंदुरी
छटा तीच यावी मग , वस्त्र - प्रावरांवरी
शुभ्र पांढरी कमले ,श्वेतांबर धरे देवी
भगवती सरस्वती ,निर्मलता मनी द्यावी ,
लाल चुन्नी, लाल चुडा, पायी महावर लाल
ओठी रंगलाय विडा , रूप मनी हे ठसलं

प्रार्थना
विमलमती दे गजानना
भालचंद्रा सिंदुरारि हिची कामना
लेण्याद्री रमलास गौरीनंदना
लेप रक्तगंधाचा हा गजवदना
सप्रेमे आळवू सिध्दिगणेशा
त्वरा करा या हो गणाधीशा
तत्वमसि तू, गणपती तू
राजसवदना,तू, अधिपती तू
व्यास-शिष्या आता दु:ख हरा
वाढते मोदक, वाहते दुर्वांकुरा
दिवसें-दिवशी मोद भरा
शुभंकरी सुखकरी हो, मयुरेश्वरा
हिची तव चरणी प्रार्थना ....

विजया केळकर __

श्रावण पाऊस
आला आला पाऊस आला
संगे श्रावण मास हा आला
जीवाची सरली घालमेल
सणासुदीची रेलचेल
उन्हां पावसाचा लपंडाव
सोमवारी पूजा सदाशिव
मंगळागौर देईल वरदान
अर्पिता सोळा पत्री-फुले, सौभाग्यवाण
वंदा बुध-बृहस्पती
बनण्या विद्या वाचस्पती
आघाडा,दुर्वा,चणे-गूळघेऊन पूजती
लेकुरे उदंड करी आई जिवती
संपत शनिवार,राणूबाईचा आदित्यवार
व्रत वैकल्यांचा महिमा अपरंपार
शेतीसाठी नागांना वाचवा
नागपंचमी सांगे सख्यभाव जागवा
प्रेमबंधन राखीचं राखा
झाला कृष्ण द्रोपदीचा पाठीराखा
वन्देमातरम् चा करवा गजर
हाती ध्वज तिरंगा, उधळा अबीर