वाट

वाट कशी सापडावी, घनदाट तिमिरी
जायचे जीवन गंगेच्या पैलतीरी ...

वाट कशी सापडावी, चांदण्यांच्या बाजारी
चंद्र नसे उभा शेजारी ...

वाट कशी सापडावी, लाल रणांगणावरी
समीर सांगतो 'लाल' बुडाला समरी ...

वाट कशी सापडावी, केशरी क्षितीजावरी
करावा जौहर तो निजला अंकावरी ...

वाट कशी सापडावी, प्रखर प्रहरी
सावलीही काकुळतीने पाय धरी ...

वाट कशी सापडावी, स्वप्नपटलावरी
जगते रहोचा गजर करी पहारेकरी ...

वाट कशी सापडावी, डोळे मिटल्यावरी
वाट आपोआप सापडावी डोळे मिटल्यावारी .....

कुठून लकेर येते, माझे जीवन गाणे होते!

लाटेचे पैंजण किणकिणती, झुळकेशी खिदळत मोहक गाती,
अल्हाद सूरांना दटावत एक, पान तिथे संन्यासी होते-
माझे जीवन गाणे होते!

मध्येच दिसते, लपून बसते, लाजून आढेवेढे घेते,
मनमोराला उगा खूळावत, अवखळ धून सवार होते-
माझे जीवन गाणे होते!

मी पहिली मी पहिली म्हणते, अल्लड श्रुती नादावत जाते,
भावसख्याचे गूज लेऊनी, खळखळते! रुणझूणते!
माझे जीवन गाणे होते!

- चिन्नु

अक्षय तृतीया

माझ्या साजणा,माझी हौस कि हो पुरावा
माळा कि माझ्या केसात मोगऱ्याचा गजरा

धवल पुष्पे,गंध मादक हा बरवा
धरा जीवलगा,हात हातात कि धरा

वीणेची तार छेडता, वेड लागले जीवा
वीजू चमकता जैसे नाचे मन मयुरा

वैभव विपुल आता घर कि सजवा
वैशाख तृतीया आज, सख्या येतील घरा

द्याया शुभेच्छा, आंबे-डाळ, पन्हे बनवा
द्या हरभऱ्याची ओटी, येऊ द्या थंडगार वारा

सख्या म्हणती रहावा जीवनी गोडवा
लाजती 'नाव'घेता,दिन झाला साजरा

गौरी निघाली आपुल्या गावा
या शुभ दिनी हसत मुखे पाठवण करा....

Sea Fever : BY JOHN MASEFIELD या कवितेचा स्वैर अनुवाद

सागरओढ

आज गेलंच पाहिजे, खोल खोल एकांत समुद्रात आभाळासोबत,
संगतीला हवीय उंच शिडाची होडी अन तिलाच न्याहाळणारा एक तारा;
सुकाणूचा ताबा अन वाऱ्याच्या शिळेवर फडफडणारे शुभ्र पांढरे शीड,
सागरावरच्या गुढ गडद धुक्याला कापत जाणारा संधीप्रकाश.

मला पुन्हा जायलाच हवं, समुद्रात खोल खोल, बोलावतेय प्रत्येक लाट
वाऱ्याचा तो पुकारा, अगदी आतून आलेला, नाहीच टाळता येणार आता;
शुभ्र नभांनी गच्च भरलेला वादळी दिवस हवाय फक्त एक,
फेसाळलेल्या फुटणाऱ्या लाटांचे तुषार, सीगलचा आर्त पुकारा.

मला गेलच पाहिजे समुद्रात खोल खोल, त्या वेड्या दर्यावर्दीसारखं,

वारा
आला आला आला
कोणी पहिला ?
कसा दिसला ?
नाही कळला ,आला आला आला

अलगद पडदा हलला,
घरभर फिरला
प्रत्येक जण हसला
आला आला आला

आला म्हणता पसार झाला
कोणी नव्हते खेळायला
रागावला, गरम झाला
स्तब्ध व लाही लाही झाला

अंगात आले,गरगर फिरला
धुळीने माखला
धक्का दिला झाडाला
गेला गेला गेला

ढगांना गराडा घातला
गडगडाटात कडकडून भेटला
अश्रूत न्हाला
आला आला आला

थरथर कापत आला
दार कोणी उघडीना त्याला
दुलई शोधू लागला
गारव्यातच उभा राहिला

फुंकर मारली शेकोटीला
पर्णेच पांघरला
ऊब मिळाली शरीराला
सुगंध उधळीत आला

लू sलूsलू sलूs करत बहुरुपी अनिल बनला

माझ्या मनाचा झोका उंच उंच गेला
उंचावरुनी क्षितिजे पहायची होती त्याला …

महान उंचीमुळे मला भोवळ आली
कारण उंची एवढीच खोली होती खाली …

मन अस्वस्थ झाले ,हेलकावे खात राहिले
मोठमोठ्या पहाडाना धडकत खाली आले

जेथून क्षितिजे दिसत नव्हती
लहान लहान टप्पे होते ,

झाडे झुडपे खडक होते ,
मला न्याहाळता येत होते

आता मन शहाणे झाले
त्याला जणू जाण आली
स्वप्न बघायचीच ,पण
जोखून उंची नि खोली

ग्रीष्म
सरले नवपल्लवांचे कोवळेपण,वृक्ष झाले घनदाट
गळले पुष्पदल, आला फळांचा बहर
उठले सूर्यदेव घाई-घाई, लवकर झाली पहाट
पडले ग्रीष्म पाऊल, झाला उष्म्याचा कहर ---
स्वतापे तापला, चाल मंदावली
ढग सरसावला करण्या सावली
तापे विरला, सरला मागे आल्या पावली
वाट पहाता संध्या खंतावली ---
तप्त वारा.. द्या द्या त्यास थंडावा
पाजा पाणी वा पेय थंडगार
अडोशाला आला रानपाखरांचा थवा
बालकांच्या आनंदा न पारावार---
पिवळी खिरणी,लांब काकडी
बदामी खरबूज, लाल टरबूज
विविध आंब्यांची हात गाडी
पण सारे करती कुजबूज ---
जांभळे हिरवीच आहेत अजून
मोगरा गंध मुठीत आहे धरून

स्वागत
शिशिर सरता सरता सांगे वसंताशी
बर का नीट कर सृष्टीशी
अन बहरला कि रानी-वनी
पिका गानाची घाली मोहिनी
गुलमोहरा दिली लाल वसनं
बहावा वर लाविली पिवळी केतनं
मधुरा फळांची परीक्षिती कोण कोण?
रावे नि सारे खग गण
आली आली चैत्रगौर
नवरात्रीच्या तृतीयेस माहेरी
नवरात्रीत जागवा नवदुर्गा नि अंबिका
गालात हसली रेणुका
उधळा उधळा मोगरा न सुगंधी फुले
नि ती उधळील सुवर्णफुले
सौख्यासिंधू च्या लहरी या लहरी
स्पर्शल्या मनास, चढल्या शेखरी ...

विजया केळकर___